قصور: 4 اگست 2026ء کو یومِ شہدائے پولیس کے موقع پر ضلع قصور کے مختلف مقامات پر پولیس شہداء کی یاد میں شمعیں روشن کی گئیں اور ان کی قربانیوں کو خراجِ عقیدت پیش کیا گیا۔

قصور پولیس کے مطابق ڈی پی او قصور آفتاب احمد پھلروان نے ریلوے اسٹیشن چوک قصور میں منعقدہ مرکزی تقریب میں شرکت کرتے ہوئے شہداء کی یاد میں شمعیں روشن کیں۔ اس موقع پر ڈی ایس پی سٹی، مختلف تھانوں کے ایس ایچ اوز، تاجر برادری، امن کمیٹی کے اراکین، سول سوسائٹی، صحافیوں اور شہریوں کی بڑی تعداد بھی موجود تھی۔

ڈی پی او قصور نے کہا کہ قصور پولیس کے 35 سپوتوں نے عوام کے جان و مال کے تحفظ کے لیے اپنی جانوں کا نذرانہ پیش کیا، جن کی قربانیوں کو ہمیشہ یاد رکھا جائے گا۔

انہوں نے کہا کہ قصور پولیس اپنے شہداء کے اہلِ خانہ کے ساتھ پہلے کی طرح آئندہ بھی کھڑی رہے گی، کیونکہ زندہ قومیں اپنے محفوظ مستقبل کے لیے جانوں کا نذرانہ پیش کرنے والے شہداء کو کبھی فراموش نہیں کرتیں۔

آفتاب احمد پھلروان نے مزید کہا کہ شہداء اپنے لہو سے قوم کی تاریخ رقم کرتے ہیں اور قصور پولیس کی تاریخ بھی انہی روشن ستاروں کی قربانیوں سے تابندہ ہے۔ ان کے مطابق شہداء کی قربانیاں ہی ہمارے محفوظ آج کی ضمانت ہیں، جبکہ وہ تمام خاندان جنہوں نے اپنے پیاروں کو وطن اور عوام کی خاطر قربان کیا، پوری قوم کے محسن ہیں۔

قصور پولیس کے مطابق ڈی ایس پی چونیاں اور ڈی ایس پی پتوکی نے بھی مقامی سول سوسائٹی کے ہمراہ چونیاں اور پتوکی میں الگ الگ تقریبات کے دوران شمعیں روشن کر کے شہدائے پولیس کو خراجِ عقیدت پیش کیا۔