قصور: عظیم صوفی بزرگ حضرت بابا بلھے شاہؒ کے تین روزہ عرس مبارک کے موقع پر فول پروف سکیورٹی اور بہترین انتظامات پر مقامی صحافی محمد آصف نے ڈپٹی کمشنر قصور، ڈی پی او قصور، ضلعی انتظامیہ سمیت تمام متعلقہ اداروں کا شکریہ ادا کیا ہے۔

محمد آصف نے سوشل میڈیا پر اپنے پیغام میں کہا کہ حضرت بابا بلھے شاہؒ کے عرس کے موقع پر ضلعی انتظامیہ، تمام اداروں، سول سوسائٹی، انجمن تاجران، مذہبی امور کمیٹی اور محکمہ اوقاف کے عملے کی جانب سے کیے گئے انتظامات قابلِ تحسین ہیں۔

انہوں نے مثبت صحافت کرنے والے صحافیوں کو بھی خراجِ تحسین پیش کرتے ہوئے کہا کہ وہ اپنے شہر کو داغدار ہونے سے بچانے اور قصور کی مثبت تصویر اجاگر کرنے میں اپنا کردار ادا کرتے رہے ہیں۔

محمد آصف نے اپنے پیغام میں کہا کہ قصور کے والی، شہنشاہِ قصور حضرت بابا بلھے شاہؒ کے ویہڑے کو چار چاند لگانے والے تمام افراد کو سلام پیش کرتے ہیں، جبکہ فرضی ریٹنگ کی خاطر شہر کو بدنام کرنے والوں کے لیے دعا کی کہ اللہ تعالیٰ انہیں ہدایت دے۔

انہوں نے بالخصوص ڈی سی قصور محمد آصف رضا، ڈی پی او قصور آفتاب احمد پھلروان اور ضلعی انتظامیہ سمیت تمام اداروں کی کاوشوں کو سراہتے ہوئے انتظامات پر اظہارِ تشکر کیا۔