قصور: عظیم صوفی بزرگ حضرت بابا بلھے شاہؒ کے 269ویں سالانہ تین روزہ عرسِ مبارک کی تقریبات کامیابی سے اختتام پذیر ہو گئی ہیں۔ عرس کے اختتام کے بعد سوشل میڈیا پر قصور کی صحافتی برادری، زائرین اور شہریوں کی جانب سے ضلعی انتظامیہ کے انتظامات کو سراہنے اور بالخصوص ڈپٹی کمشنر قصور محمد آصف رضا کو خراجِ تحسین پیش کرنے والی متعدد پوسٹس سامنے آ رہی ہیں۔

شہریوں اور مختلف حلقوں کی جانب سے کہا جا رہا ہے کہ اس مرتبہ عرسِ بابا بلھے شاہؒ کے موقع پر سیکیورٹی، ٹریفک مینجمنٹ، صفائی ستھرائی، روشنی، زائرین کی رہنمائی، طبی سہولیات اور دیگر انتظامات میں نمایاں بہتری نظر آئی، جس سے ملک بھر سے آنے والے زائرین کو سہولت فراہم ہوئی۔

سوشل میڈیا پر سامنے آنے والے مختلف تاثرات میں وزیر اعلیٰ پنجاب مریم نواز شریف کی خصوصی ہدایات اور ضلعی انتظامیہ قصور کی جانب سے ان ہدایات پر عملدرآمد کو بھی سراہا جا رہا ہے۔ شہری حلقوں کے مطابق صوبائی حکومت کی توجہ اور ضلعی سطح پر مؤثر انتظامی اقدامات کے باعث قصور کے تاریخی اور صوفیانہ تشخص کو اجاگر کرنے میں مدد ملی۔

بالخصوص ڈی سی قصور محمد آصف رضا کی کاوشوں کو مختلف حلقوں کی جانب سے نمایاں طور پر سراہا جا رہا ہے۔ شہریوں کا کہنا ہے کہ عرس کے کئی ماہ قبل شروع ہونے والی تیاریوں، مختلف محکموں کے درمیان رابطہ کاری اور عرس کے تینوں دن انتظامات کی نگرانی نے مجموعی طور پر انتظامی امور کو بہتر بنانے میں کردار ادا کیا۔

عرس کے موقع پر مزارِ اقدس اور اطراف کی تزئین و آرائش، خوبصورت روشنیوں، صفائی، میڈیکل کیمپس، ریسکیو و سول ڈیفنس کیمپ، پولیس کیمپ، مانیٹرنگ اور سیکیورٹی انتظامات بھی شہریوں کی توجہ کا مرکز رہے۔

قصور کی صحافتی برادری کی جانب سے بھی ایسے انتظامات کو مثبت انداز میں اجاگر کیا جا رہا ہے، جن سے شہر کا مثبت تشخص سامنے آتا ہے۔ مختلف صحافیوں اور شہریوں کی جانب سے کے فور قصور کو بھی اس حوالے سے مسلسل مثبت اور معلوماتی کوریج کرنے پر سراہا جا رہا ہے۔

شہریوں کا کہنا ہے کہ حضرت بابا بلھے شاہؒ کا عرس صرف قصور کا مذہبی و صوفیانہ اجتماع نہیں بلکہ شہر کی تاریخی، ثقافتی اور روحانی شناخت سے جڑا اہم موقع ہے۔ اس لیے ایسے بڑے اجتماع کے دوران بہتر انتظامات نہ صرف زائرین کے لیے سہولت کا باعث بنتے ہیں بلکہ قصور کا نام بھی مثبت انداز میں ملک بھر میں اجاگر ہوتا ہے۔

تین روزہ عرس کی تقریبات کے کامیاب اختتام پر شہریوں اور صحافتی حلقوں نے ضلعی انتظامیہ قصور، پولیس، محکمہ اوقاف، ریسکیو 1122، میونسپل اداروں، سول ڈیفنس، طبی عملے، متعلقہ سرکاری محکموں اور تمام معاون اداروں کی مشترکہ کاوشوں کو بھی خراجِ تحسین پیش کیا ہے۔

قصور کے شہریوں کی جانب سے مطالبہ بھی سامنے آ رہا ہے کہ حضرت بابا بلھے شاہؒ کے عرس کے دوران کیے گئے مثبت انتظامی اقدامات کو آئندہ بھی برقرار رکھا جائے اور قصور کی تاریخی و صوفیانہ شناخت کو مزید اجاگر کرنے کے لیے مستقل بنیادوں پر کام جاری رکھا جائے۔