قصور، 14 اگست 2026: یومِ آزادیِ پاکستان کے پرمسرت موقع پر انجمن شہریان قصور اور انجمن تاجران قصور کے اشتراک سے ایک پروقار تقریب کا انعقاد کیا گیا۔

تقریب کی میزبانی اور انتظامات میں دونوں تنظیموں کے عہدیداران نے کلیدی کردار ادا کیا، جن میں انجمن تاجران قصور کے چیئرمین شہزاد ساجد شیخ، صدر چوہدری محمد اکرم مغل اور جنرل سیکرٹری آصف علی کھوکھر جبکہ انجمن شہریان قصور کی جانب سے سرپرست اعلیٰ وقار احمد خان، صدر ڈاکٹر شفیق احمد شیخ اور جنرل سیکرٹری امجد ظفر شامل تھے۔

تقریب میں اسسٹنٹ کمشنر قصور ثاقب ترازی نے بطور مہمانِ خصوصی شرکت کی، جبکہ شہریوں اور تاجر برادری کی بڑی تعداد نے بھی بھرپور جوش و جذبے کے ساتھ شرکت کی۔

تقریب کا آغاز تلاوتِ کلامِ پاک سے ہوا، جس کے بعد بارگاہِ رسالت مآب ﷺ میں نعتِ رسولِ مقبول ﷺ پیش کی گئی۔ بعد ازاں تمام شرکاء نے کھڑے ہو کر احترام کے ساتھ قومی ترانہ پڑھا اور وطنِ عزیز پاکستان سے اپنی محبت کا اظہار کیا۔

اس موقع پر شرکاء نے خطاب کرتے ہوئے یومِ آزادی کی اہمیت، قیامِ پاکستان کے مقاصد اور ملکی تعمیر و ترقی میں تاجروں اور عام شہریوں کے کردار پر روشنی ڈالی۔

تقریب کے اختتام پر جشنِ آزادی کی خوشی کو دوبالا کرنے کے لیے کیک کاٹا گیا، جبکہ ملک و قوم کی سلامتی، ترقی، استحکام اور امن و امان کے لیے خصوصی دعا بھی کروائی گئی۔

تقریب کا اختتام پرتکلف ناشتے پر ہوا، جس میں تمام معزز مہمانوں اور شہریوں کی تواضع کی گئی۔