قصور: تھانہ شیخم پولیس نے مبینہ طور پر ڈکیتی، چوری اور جیب تراشی کی وارداتوں میں ملوث 10 رکنی بابر عرف بدو گینگ کے خلاف کارروائی کرتے ہوئے کوٹرادھاکشن میں اس کے مبینہ کارندے یوسف عرف منگو کی گرفتاری اور مالِ مسروقہ کی برآمدگی کے لیے چھاپہ مارا۔

پولیس کے مطابق یوسف عرف منگو کوٹرادھاکشن کا رہائشی اور مبینہ طور پر گینگ کا سرگرم رکن ہے۔ پولیس کا دعویٰ ہے کہ مذکورہ گروہ پنجاب کے مختلف علاقوں، بشمول ضلع قصور، میں شہریوں کو لوٹنے کی وارداتوں میں ملوث تھا، جبکہ وارداتوں کے بعد یوسف مبینہ طور پر چوری شدہ موبائل فونز کے آئی ایم ای آئی (IMEI) نمبرز تبدیل کرکے فروخت کرتا تھا۔

پولیس کے مطابق تھانہ شیخم کی ٹیم نے مسلسل کوششوں کے بعد بدو گینگ کو ٹریس کیا۔ گرفتار ملزم علی حیدر کے انکشاف پر یوسف عرف منگو کی گرفتاری اور مالِ مسروقہ کی برآمدگی کے لیے کوٹرادھاکشن کے علاقے میں کارروائی کی گئی۔

پولیس کا کہنا ہے کہ چھاپے کے دوران ملزم نے گرفتاری سے بچنے کے لیے مزاحمت کی اور مبینہ طور پر شیشے کا گلاس اور پیچ کس اپنے سر پر مارا، جبکہ خود کو کرنٹ لگانے کی کوشش بھی کی۔ پولیس کے مطابق ٹیم نے صبر و تحمل کا مظاہرہ کیا اور ملزم پر کسی قسم کا تشدد نہیں کیا گیا۔

پولیس نے مزید بتایا کہ تھانہ کوٹرادھاکشن میں ملزم اور مزاحمت کرنے والے دیگر افراد کے خلاف اقدامِ خودکشی سمیت مختلف دفعات کے تحت مقدمہ درج کر لیا گیا ہے۔

پولیس حکام کے مطابق مختلف پیشوں کا روپ دھار کر مبینہ جرائم میں ملوث عناصر کے خلاف کارروائیاں جاری رہیں گی اور شہریوں کو لوٹنے والوں کے خلاف قانون کے مطابق کارروائی کی جائے گی۔