قصور میں پنجاب کاؤنٹر نارکوٹکس فورس (CNF) کے نئے اسٹیشن کا باقاعدہ افتتاح سپیکر پنجاب اسمبلی ملک محمد احمد خان نے بطور مہمانِ خصوصی کیا۔ تقریب میں صوبائی وزیر تعلیم رانا سکندر حیات خان، سیکرٹری ایکسائز، ٹیکسیشن اینڈ نارکوٹکس کنٹرول کرنل مسعود حیات، ڈی جی پنجاب کاؤنٹر نارکوٹکس فورس بریگیڈیئر مظہر اقبال، غضنفر کاشف اور دیگر اعلیٰ حکام بھی شریک ہوئے۔

افتتاحی تقریب کے دوران سپیکر پنجاب اسمبلی کو پنجاب کاؤنٹر نارکوٹکس فورس کی گزشتہ 11 ماہ کی کارکردگی، جاری آپریشنز اور مستقبل کی حکمت عملی پر تفصیلی بریفنگ دی گئی۔ انہیں فورس کی پیشہ ورانہ استعداد، جدید آلات اور منشیات کے خلاف جاری کارروائیوں سے بھی آگاہ کیا گیا۔

میڈیا سے گفتگو کرتے ہوئے ملک محمد احمد خان نے کہا کہ قصور میں قائم ہونے والا پنجاب کاؤنٹر نارکوٹکس فورس اسٹیشن ضلع اور گردونواح میں منشیات کے خلاف کارروائیوں کو مزید مؤثر بنانے میں اہم کردار ادا کرے گا۔ انہوں نے کہا کہ وزیراعلیٰ پنجاب کی جانب سے پنجاب کاؤنٹر نارکوٹکس فورس کا قیام ایک دوراندیش اور مؤثر اقدام ہے، جس کا مقصد نوجوان نسل کو منشیات کے ناسور سے محفوظ بنانا ہے۔

سپیکر پنجاب اسمبلی نے کہا کہ منشیات فروش معاشرے کے دشمن ہیں اور ان کے خلاف تمام متعلقہ ادارے مشترکہ حکمت عملی کے تحت کارروائیاں جاری رکھیں گے۔ انہوں نے اس بات پر زور دیا کہ جرائم کی نوعیت تیزی سے تبدیل ہو رہی ہے، اس لیے قانون نافذ کرنے والے اداروں کو بھی جدید تقاضوں کے مطابق اپنی صلاحیتوں اور طریقہ کار کو بہتر بنانا ہوگا۔

انہوں نے مزید کہا کہ پنجاب کاؤنٹر نارکوٹکس فورس کی تربیت، جدید ٹیکنالوجی اور آپریشنل صلاحیتیں بین الاقوامی معیار کے مطابق ہیں۔ ایک نئے ادارے کا قیام آسان نہیں ہوتا، تاہم حکومت پنجاب نے منشیات کے خاتمے کے لیے ایک مضبوط، خودمختار اور خصوصی فورس قائم کرکے اہم پیش رفت کی ہے۔

ملک محمد احمد خان نے عوام پر بھی زور دیا کہ وہ منشیات کے خاتمے کی مہم میں قانون نافذ کرنے والے اداروں کے ساتھ تعاون کریں، کیونکہ اس ناسور کے خاتمے کے لیے صرف حکومتی اقدامات ہی نہیں بلکہ عوامی شمولیت بھی ناگزیر ہے۔ انہوں نے کہا کہ خصوصی پولیسنگ جدید دور کی ضرورت ہے اور دنیا بھر میں مختلف نوعیت کے جرائم سے نمٹنے کے لیے خصوصی فورسز قائم کی جا رہی ہیں۔ عام پولیس پر متعدد ذمہ داریاں ہوتی ہیں، اس لیے منشیات کے خلاف مؤثر کارروائیوں کے لیے خصوصی فورس کا قیام وقت کی اہم ضرورت تھا۔

سپیکر پنجاب اسمبلی نے اس عزم کا اظہار کیا کہ تمام متعلقہ ادارے اپنے آئینی اور قانونی دائرۂ اختیار میں رہتے ہوئے منشیات کے خاتمے کے لیے باہمی تعاون کے ساتھ کام جاری رکھیں گے، جبکہ قانون کے غلط استعمال کی کسی صورت اجازت نہیں دی جائے گی۔