پنجاب بھر کی طرح قصور میں بھی نہروں میں نہانے پر دفعہ 144 نافذ، محکمہ آبپاشی کی شہریوں سے احتیاط کی اپیل

قصور: پنجاب بھر کی طرح قصور کینال ڈویژن کی حدود میں بھی نہروں میں نہانے پر دفعہ 144 نافذ کر دی گئی ہے تاکہ عوام کی جان و مال کا تحفظ یقینی بنایا جا سکے اور نہروں میں پیش آنے والے حادثات کی روک تھام کی جا سکے۔

محکمہ آبپاشی پنجاب کی جانب سے قصور کی مختلف نہروں کے کنارے انتباہی بینرز آویزاں کر دیے گئے ہیں، جبکہ مساجد سے اعلانات کے ذریعے شہریوں کو نہروں میں نہانے کے خطرات اور نافذ پابندی سے آگاہ کیا جا رہا ہے۔

اس کے ساتھ ساتھ محکمہ آبپاشی کی فیلڈ ٹیمیں مختلف مقامات پر آگاہی مہم بھی چلا رہی ہیں تاکہ شہری حفاظتی ہدایات پر عمل کریں اور کسی بھی ناخوشگوار واقعے سے محفوظ رہیں۔

محکمہ آبپاشی نے شہریوں سے اپیل کی ہے کہ وہ اپنی اور اپنے اہلِ خانہ کی حفاظت کے لیے نہروں میں نہانے سے گریز کریں، انتظامیہ سے تعاون کریں اور خصوصاً بچوں کو نہروں کے قریب جانے سے روکیں۔

محکمہ کے مطابق عوامی تعاون ہی قیمتی انسانی جانوں کے تحفظ اور محفوظ معاشرے کے قیام کی ضمانت ہے۔