قصور: صحافی میاں کاشف نے اپنے نجی دورے کے دوران جھیل سیف الملوک میں پنجاب حکومت کی پیرا فورس کی ایک سرکاری ویگو گاڑی موجود ہونے پر سوال اٹھا دیا، جس کے بعد یہ معاملہ سوشل میڈیا پر زیرِ بحث آ گیا۔

میاں کاشف نے اپنی سوشل میڈیا پوسٹ میں لکھا، “سوال یہ نہیں کہ ویگو ڈالا کہاں پہنچا، سوال یہ ہے کہ اختیارات کی حد کہاں ختم ہوتی ہے؟”

انہوں نے مؤقف اختیار کیا کہ سرکاری وسائل اور سرکاری گاڑیوں کے استعمال سے متعلق واضح ضابطہ کار ہونا چاہیے تاکہ عوام کے ذہنوں میں اس نوعیت کے سوالات پیدا نہ ہوں اور شفافیت کو یقینی بنایا جا سکے۔

تاحال اس معاملے پر متعلقہ ادارے یا حکام کی جانب سے کوئی باضابطہ وضاحت سامنے نہیں آئی، جبکہ سوشل میڈیا پر مختلف صارفین اس حوالے سے اپنی آراء کا اظہار کر رہے ہیں۔