راولپنڈی: پاک فوج کے شعبہ تعلقات عامہ (آئی ایس پی آر) کے مطابق 5 اور 6 اگست 2026 کو بلوچستان کے واشک اور مستونگ اضلاع میں انٹیلی جنس کی بنیاد پر دو بڑے آپریشن کیے گئے، جن کے دوران مجموعی طور پر 12 دہشت گرد مارے گئے۔

آئی ایس پی آر کے مطابق یہ کارروائیاں “رَدُّ الفتنہ-3” کے تحت جاری انٹیلی جنس بیسڈ آپریشنز کا حصہ تھیں۔

بیان کے مطابق 5 اگست کو ضلع واشک میں سیکیورٹی فورسز نے دہشت گردوں کی نقل و حرکت کا سراغ لگایا۔ کارروائی کے دوران فورسز نے مؤثر انداز میں دہشت گردوں کو نشانہ بنایا، جس کے نتیجے میں 6 دہشت گرد ہلاک ہوگئے۔

آئی ایس پی آر کے مطابق 6 اگست کو ضلع مستونگ میں ایک اور انٹیلی جنس بیسڈ آپریشن کے دوران شدید فائرنگ کے تبادلے میں مزید 6 دہشت گرد مارے گئے، جبکہ ان کا ٹھکانہ بھی تباہ کر دیا گیا۔

آئی ایس پی آر نے مزید کہا کہ “عزمِ استحکام” کے وژن اور نیشنل ایکشن پلان کی وفاقی ایپکس کمیٹی کے فیصلوں کے مطابق پاکستان کی سیکیورٹی فورسز اور قانون نافذ کرنے والے ادارے ملک سے بیرونی سرپرستی میں ہونے والی دہشت گردی کے خاتمے کے لیے کارروائیاں جاری رکھیں گے۔