قصور: ضلع قصور کے سرحدی علاقے گنڈا سنگھ میں دریائے ستلج سے ایک بڑی مچھلی کے شکار کی ویڈیو سوشل میڈیا پر وائرل ہو گئی ہے، جسے مقامی ولاگر اور دریائی اپڈیٹس دینے والے عبدالرحمن نے اپنے چینل پر شیئر کیا۔

ویڈیو کے مطابق یہ مچھلی روایتی طریقہ یعنی کُنڈی کے ذریعے پکڑی گئی، جس کا وزن تقریباً 14 کلوگرام بتایا جا رہا ہے۔ شکار کے دوران مقامی افراد بھی موقع پر موجود تھے اور مچھلی کو پانی سے نکالنے کے لیے کافی محنت کرنا پڑی۔

عبدالرحمن کے مطابق یہ شکار گنڈا سنگھ کے مقام پر دریائے ستلج سے کیا گیا، جہاں مقامی ماہی گیر روزانہ کی بنیاد پر مختلف اقسام کی مچھلیاں پکڑتے ہیں۔ ان کے مطابق حالیہ دنوں میں پانی کی صورتحال بہتر ہونے سے دریائی آبی حیات دوبارہ متحرک ہو رہی ہے۔

مقامی لوگوں کا کہنا ہے کہ اس طرح کے واقعات نہ صرف علاقے میں دلچسپی پیدا کرتے ہیں بلکہ ماہی گیری کی روایتی ثقافت کو بھی اجاگر کرتے ہیں۔ کئی افراد نے اس ویڈیو کو سوشل میڈیا پر شیئر کرتے ہوئے اسے خوش آئند قرار دیا ہے۔

دریائے ستلج کے کنارے آباد یہ علاقے صدیوں سے ماہی گیری کے پیشے سے جڑے ہوئے ہیں، اور آج بھی یہاں کے لوگ اسی روایتی ہنر کو اپنی روزی روٹی کا ذریعہ بنائے ہوئے ہیں۔