بلھے شاہ پسنجر ٹرین کا آج افتتاح، 10 ہزار سے زائد کرسیاں، 50 ہزار افراد کی آمد متوقع، “آج تاریخ رقم ہوگی”، عبدالرحمن شاہ کاظمی

قصور/کھڈیاں خاص: کھڈیاں ریلوے اسٹیشن پر آج 17 جولائی کی شام 6 بجے بلھے شاہ پسنجر ٹرین کی افتتاحی تقریب منعقد ہوگی، جس کی صدارت سپیکر پنجاب اسمبلی ملک محمد احمد خان کریں گے۔

سپیکر پنجاب اسمبلی کے پرسنل سیکرٹری عبدالرحمن شاہ کاظمی نے ایک انٹرویو میں دعویٰ کیا کہ “آج تاریخ رقم ہوگی۔” ان کے مطابق افتتاحی تقریب میں تقریباً 50 ہزار افراد کی شرکت متوقع ہے، جبکہ شرکاء کے لیے 10 ہزار سے زائد کرسیاں لگائی جا رہی ہیں۔

عبدالرحمن شاہ کاظمی نے کہا کہ یہ سپیکر پنجاب اسمبلی کا آبائی حلقہ ہے اور “سپیکر صاحب کے لیے ایک دن میں اتنے لوگوں کو اکٹھا کرنا کوئی مشکل کام نہیں۔” ان کے مطابق تقریب میں شریک ہونے والے افراد کی اکثریت کھڈیاں خاص اور گردونواح کے علاقوں سے ہوگی۔

واضح رہے کہ بلھے شاہ پسنجر ٹرین کی بحالی کو ضلع قصور، خصوصاً کھڈیاں خاص اور ملحقہ علاقوں کے عوام کے لیے ایک اہم سفری پیش رفت قرار دیا جا رہا ہے، جس سے روزانہ سفر کرنے والے ہزاروں مسافروں کو سہولت میسر آئے گی۔