قصور: تجاوزات کے خلاف کارروائی کے دوران مبینہ طور پر ایک غریب فروش کی امرود کی ٹوکری ضبط کیے جانے کی ویڈیو سامنے آنے کے بعد مقامی سطح پر سخت ردعمل سامنے آیا ہے۔

ویڈیو میں پیرا فورس کی گاڑی کے پیچھے امرود کی ایک ٹوکری دکھائی دیتی ہے، جس پر سخت ترین الفاظ میں مقامی صحافی نے سوال اٹھاتے ہوئے کہا کہ کارروائی کا رخ صرف غریبوں کی طرف نہیں ہونا چاہیے۔

صحافی کا کہنا تھا کہ اگر تجاوزات کے خلاف کارروائی ضروری ہے تو اس میں یہ بھی دیکھا جانا چاہیے کہ ایک غریب شخص کی روزی کا واحد ذریعہ چھیننے کے بعد اس کے گھر کا چولہا کیسے جلے گا؟

امرود کی ایک معمولی سی ٹوکری کی تصویر نے شہریوں کے سامنے ایک بڑا سوال کھڑا کر دیا ہے: کیا قانون اور تجاوزات کے خلاف کارروائی کا بوجھ ہمیشہ کمزور اور دیہاڑی دار طبقے ہی کو اٹھانا ہوگا؟

اگر یہ ٹوکری واقعی کسی غریب ریڑھی یا خوانچہ فروش کی روزی کا ذریعہ تھی تو کارروائی کے ساتھ انسانی پہلو کو بھی مدنظر رکھنا ضروری تھا۔ تجاوزات کا خاتمہ اپنی جگہ، مگر غریب کی روزی چھین لینا کسی بھی معاشرے کے لیے ایک تکلیف دہ منظر ہے۔