Indian Gangster Lawrence Bishnoi Charged in Nijjar Murder Case

امریکا کے وفاقی پراسیکیوٹرز نے بھارتی گینگسٹر لارنس بشنوئی اور اس کے قریبی ساتھی ستندرجیت سنگھ عرف گولڈی برار پر الزام عائد کیا ہے کہ انہوں نے 2023 میں کینیڈا میں سکھ علیحدگی پسند رہنما ہردیپ سنگھ نجر کے قتل کی سازش تیار کی تھی۔ یہ الزامات ایک بڑے بین الاقوامی آپریشن کے دوران سامنے آئے، جس میں امریکا، کینیڈا اور یورپ میں متعدد گرفتاریاں بھی عمل میں آئیں۔

امریکی حکام کے مطابق یہ کارروائیاں بھارت سے منسلک تین منظم جرائم پیشہ گروہوں کے خلاف کئی برسوں پر محیط تحقیقات کا نتیجہ ہیں۔ استغاثہ کا کہنا ہے کہ ان گروہوں پر ٹارگٹ کلنگ، بھتہ خوری، منشیات کی اسمگلنگ اور دیگر سنگین جرائم میں ملوث ہونے کے الزامات ہیں۔ مجموعی طور پر تین مختلف فردِ جرم میں 37 ملزمان کو نامزد کیا گیا ہے۔ امریکی حکام نے یہ بھی بتایا کہ کارروائی کے دوران تقریباً 1,000 کلوگرام کوکین، ایک کلوگرام ہیروئن، 40 ہزار ڈالر نقدی اور متعدد آتشیں اسلحہ بھی برآمد کیا گیا۔

ہردیپ سنگھ نجر کو 2023 میں کینیڈا کے شہر سرے میں ایک گردوارے کی پارکنگ میں فائرنگ کرکے قتل کر دیا گیا تھا۔ وہ خالصتان تحریک کے سرگرم حامی تھے۔ یاد رہے کہ 2024 میں کینیڈا نے بشنوئی گینگ کو دہشت گرد تنظیم قرار دیا تھا، جبکہ نجر قتل کیس میں چار بھارتی شہری پہلے ہی گرفتار ہو چکے ہیں اور ان کا مقدمہ زیرِ سماعت ہے۔ لارنس بشنوئی 2015 سے بھارت کی جیل میں قید ہے، جبکہ گولڈی برار تاحال مفرور ہے۔