قصور (بیورورپورٹ) بھارتی پنجاب کے وزیراعلیٰ بھگونت مان کی پاکستان میں چوتھی بین الاقوامی پنجابی کانفرنس میں شرکت کی خواہش کے بعد اسپیکر پنجاب اسمبلی ملک محمد احمد خان نے ویڈیو پیغام کے ذریعے انہیں خوش آمدید کہا اور پنجابی زبان میں محبت بھرا پیغام دیتے ہوئے کہا: ”مان صاحب، جی آیاں نوں!“

بھارتی پنجاب کے وزیراعلیٰ بھگونت مان نے حال ہی میں پاکستان میں منعقد ہونے والی چوتھی بین الاقوامی پنجابی کانفرنس میں شرکت کی خواہش کا اظہار کیا تھا۔ ان کا کہنا تھا کہ سرحد کے دونوں جانب بسنے والے پنجابیوں کی زبان، ثقافت اور جڑیں مشترک ہیں اور وہ خود بھی اس کانفرنس میں شریک ہونا چاہتے ہیں۔

اس حوالے سے قصور سے تعلق رکھنے والے اسپیکر پنجاب اسمبلی ملک محمد احمد خان نے اپنے ویڈیو پیغام میں بھگونت مان کو پاکستان آنے کی دعوت دیتے ہوئے ان کا خیرمقدم کیا۔ انہوں نے پنجابی زبان میں ”مان صاحب، جی آیاں نوں!“ کہہ کر مہمان نوازی اور محبت کا پیغام دیا۔

پنجابی زبان، ادب اور ثقافت کے فروغ کے لیے منعقد ہونے والی یہ کانفرنس دونوں جانب کے پنجابیوں کے درمیان ثقافتی روابط کو اجاگر کرنے کا موقع فراہم کرے گی۔ بھگونت مان کی پاکستان آمد کا انحصار متعلقہ سفری اجازتوں پر ہوگا۔

ملک محمد احمد خان کے پیغام کو مشترکہ پنجابی ثقافت اور زبان سے وابستہ روابط کے تناظر میں دیکھا جا رہا ہے۔